笑看天下:火燒滙豐銅獅會有報應

反修例示威令社會持續動盪不安,元旦遊行又變成打砸商舖、塗鴉法庭並公然噴上法官名字及侮辱字句;就連滙豐銀行總行兩隻獅子銅像亦不放過,先噴紅油,又貼符咒,再縱火焚燒!「私了」銅獅後,黑衣暴徒繼續縱火堵路!

滙豐呢兩隻銅獅大有來頭,自一九三五年起鎮守滙豐總行至今,佢哋經歷唔少風風雨雨,亦吸收唔少日月精華,儼然係滙豐總行嘅「門神」。張口嗰隻名叫「史提芬」,合口嗰隻叫「施迪」,源自紀念上世紀二十年代出任香港總司理嘅史提芬,同埋時任上海分行總經理嘅施迪。

呢,滙豐銀行取意民間文化、民俗所傳,認為獅子有擋煞之功用,於是將兩隻銅獅置於大廈門前,亦吸引不少遊客在銅獅前打卡。今次銅獅被「私了」,是第二次遭無妄之災。第一次發生於二戰期間,日軍入侵香港,銅獅遭日軍子彈打咗幾個窿窿。日軍曾將銅獅運去日本打算熔鑄成彈頭,之不過二戰打到一九四五年八月十五日,日本宣布向同盟國無條件投降,銅獅避過一劫,其後佢連同維多利亞女王塑像一起被英國索回。所以話,銅獅不但係滙豐嘅守護神,更係見證香港抗日戰爭嘅重要文物。如今黑衣暴徒盡情污辱銅獅,噴紅貼符火燒,有網民不值其暴行,斥其冇文化,竟然搞風水獅子,會有報應的!

呢班黑衣暴徒,直頭中咗毒果報劇毒,佢哋被美化為「火魔法師」,縱火縱到好似神打上身,乜都燒一通,燒港鐵站、政府建築物、警車、水炮車、櫃員機、商舖、雜物,甚至點火焚不同意見者人身,連港鐵車廂都擲汽油彈,完全罔顧市民生命安全。之前暴徒在上水燒一間零售店舖,不理會樓上有住戶,烈火熊熊,幸好樓上居民及時逃出,否則後果不堪設想!暴徒不斷縱火,必如網民所斥會有報應。攬住毒果報作孽,屆時「火魔法師」變「自焚法師」,與人無尤!