元旦遊行往往係民主派政團籌款撲水時機，前日元旦遊行雖然中途被腰斬，但無阻政團撲水，不過一向吸金力唔差嘅新民主同盟今年元旦只籌得大約十二萬元，喺多個回覆我哋嘅政團中包尾。唔通該黨原本唯一嘅立法會議員范國威喺選舉呈請風波後冇得做議員，令佢哋吸金能力都大減？
新同盟尋日回覆我哋時話，今年籌款成績大約有十二萬元，扣除按慣例畀遊行主辦單位民間人權陣線嘅十分一後，初步傾向將其餘款項用於地區工作。而去年只籌得三萬一千元嘅公民黨今年就籌得十三萬元，比去年多咗成十萬元，佢哋分析籌款數字上升，並唔止因為參加人數增加，亦都反映市民對佢哋支持。問到筆錢點用，佢哋就話會用喺黨務同幫其他有需要嘅人喎。
至於工黨同社民連籌得款項相若，分別有約四十九萬元同四十五萬元。至於上年只籌得二萬九千元嘅民主黨今年只擺設一個街站，並且表明係幫「六一二基金」籌款，而最終佢哋就籌得近一百八十三萬元。該黨認為今年籌得嘅款項好難同往年比較，因為今年係幫基金籌錢，所以市民只係捐錢畀基金，係個基金號召力大啫。而該黨亦已經將全數款項捐咗畀基金喇。