政情：岑敖暉搞街坊聯誼 美食團被指「蛇齋餅糉」

有份搞呢個港島美食團嘅就係新任區議員岑敖暉，佢話呢個活動只係街坊聯誼，唔擔心被外界批評係「蛇齋餅糉」咁話喎！睇番佢哋呢個一日團，成人只需要畀一百九十八元，而十二歲或以下嘅小童同六十歲以上嘅長者更加只需一百六十八元，仲包埋酒店自助午餐添！其實個價錢做到咁平，擔唔擔心到頭來要貼錢？佢亦都話唔擔心，仲話呢個係成本價。

網民指以往有埋時間表菜單

不過，睇番佢哋宣傳海報備註有一小行字寫住「行程可能會因應突發事件而會有變動」，其實依家港島區有咁多示威活動，唔知道佢哋驚唔驚到時可能要改行程？岑亦都話唔擔心，其實佢哋都未定好行程細節。有網民就喺佢哋嘅宣傳貼文度畀意見，話以往嘅「蛇齋餅糉」團會喺海報度寫明行程時間表同菜單內容，同埋使唔使買旅遊保險。睇嚟學搞「蛇齋餅糉」都唔容易。