政情：朱順雅稱難合作 退出白鴿黨
一度被指為屯門區議會新一屆主席大熱人選嘅屯門區議員朱順雅（Beatrice）尋晚宣布退出民主黨（白鴿黨），原來佢喺去年十二月三十一日已經去信白鴿黨主席胡志偉通知要退黨。Beatrice形容呢封係佢「人生中最不願發出的信件」，但因為始終難以同黨友建立有效嘅合作，所以只好無奈退黨喎。
疑因區會主席一職有分歧
Beatrice尋晚喺社交平台宣布退黨，唔少網民都有留言，白鴿黨觀塘區議員鄭景陽都留言話︰「很想你再諗諗」但亦都有網民懷疑Beatrice係因為冇得做區議會主席先退黨，留言指︰「係咪因為選區議會主席傾唔掂數所以退黨？因為聽聞佢哋堅持要（白鴿黨屯門區議員）陳樹英做主席喎！我哋支持你，唔駛（使）驚，唔好俾（畀）個old battery（舊電池）做呀！」
其實Beatrice一九九七年大學畢業就加入白鴿黨，至今已廿二年，期間經歷兩次區選落敗，最終喺二○一二年成為屯門區議員，兩度連任。此外屯門區議員林頌鎧亦已退出白鴿黨。