中環出更：鍾志樂自爆擺過年宵 話太辛苦冇下次
歲晚年宵市場可以話係年輕人吸取營商經驗嘅途徑。傑出青年協會前副主席鍾志樂以前都試過同朋友夾份經營年宵乾貨攤位，售賣咕𠱸玩具等雜貨。佢話當時要不眠不休咁盡力招徠顧客，但事後埋單計數時就發覺賺得嘅盈利非常微薄，同辛苦付出簡直係不成比例。佢仲話，正因為咁，依家一提起經營年宵攤位，佢都耍手擰頭，唔會有下次咁話。
鍾志樂早前以嘉賓身份出席紫荊青年商會五年一度嘅會慶活動。曾為賽艇運動香港代表隊成員嘅佢就話，雖然自細就到爸爸嘅工廈食堂幫手，對做生意實際情況都有所領略，但經營年宵攤位就為佢退役從商帶嚟寶貴心得，即「棺材自己抬」。即係點解？咪就係做生意一旦合資者眾多，為免拗撬就要考慮諸多意見，若不幸有所閃失，就大家都難過，但如果自己一手包辦，就算有決策失誤，頂多都係一人承擔，所以佢目前盤生意都係盡可能親力親為。
伍婉婷：原創商品漸少
灣仔前區議員伍婉婷（Yolanda）同博愛醫院總理李淑媛都鍾意行年宵市場。Yolanda都認為年宵乾貨攤位好難賺大錢，因為精明嘅消費者往往都會留待年宵市場臨近結束時，先至向賣方討價還價，而經營者為咗散貨套現，最後亦惟有削價促銷。不過，每年維園年宵都例必捧場嘅佢又話，發覺近幾年嘅乾貨商品原創性愈來愈少，已經唔容易打動消費者嘅購買意欲喇。
姚顥頤為吸客叫破喉嚨
紫荊青年商會前會長姚顥頤、陳淑芝同新任會長甄倩儀都在場。姚喺學生時代都試過經營年宵乾貨攤位，佢就話雖然為咗吸引消費者注意而叫破喉嚨，但就從中得到入貨、定價同構思商品賣點等寶貴營商經驗。照佢咁講，都唔係冇得着嘅。
卓妮