政情：區會增選委員去存 民主派鬼打鬼

目前區議會可以委任非議員人士加入區議會轄下嘅委員會，獲委任人士作為增選委員，同區議員一樣都可以喺委員會上投票，不過每個區議會有關委任增選委員準則同制度都唔同，以南區區議會為例，就唔可以委任當屆區選落敗嘅候選人，而深水埗區議會就可由一名議員提名一名非議員人士作為增選委員。

指常被建制濫用委任敗選黨友

麥德正接受電台訪問時就話，過往建制派喺區議會佔多數時成日濫用增選委員呢個制度，例如委任敗選嘅黨友進入議會，又或者利用增選委員嘅身份助選拉票，所以必須廢除增選委員呢個制度。但麥嘅講法似乎就同民協唱反調喇。

民協深水埗區議員譚國僑就認為增選委員制度並無問題，問題在於增選委員嘅產生方法，有區議會要求所有區議員核准，增選委員先可以加入議會，變相會被議會嘅大多數派系壟斷。但深水埗區議會係由一個區議員提名一個增選委員，再以抽籤方式決定增選委員參與邊個委員會，咁就公平得多。而增選委員可以係學者等人士，可協助議會工作，補充區議員專業知識上嘅不足，提高議政水平。而同為民協嘅深水埗候任區議員徐溢軒都認為，只要民主派善用制度，增選委員亦係培育政治人才嘅機會，可以畀有心人服務社區，而佢自己亦曾擔任增選委員。

對政治新人嚟講係學習機會

建制派方面，同樣都曾出任增選委員、身兼觀塘區議員同立法會議員嘅柯創盛就話，增選委員嘅工作對政治新人嚟講係新嘗試，亦係培養青年人學習議會運作嘅好機會，不過佢就對是否取消有關制度持開放態度，認為可視乎各區區議會情況而定。 而順利連任嘅觀塘區議員顏汶羽就覺得，增選委員嘅角色就係喺委員會加入唔同背景人士，令討論更全面，對於民主派有分歧，佢就話係好正常嘅事喎。今屆區議會建制派變成少數，民主派呢幾年將區會搞成點，建制派真係買定花生都得喇。