中環出更：葉劉赴太平清醮誌慶 再遇麒麟冇被撞飛
新民黨主席兼立法會議員葉劉淑儀喺一五年到車公廟時遭麒麟撞飛後，運勢一直平平，新一屆區議會選舉新民黨更是「全軍覆沒」，葉劉前日就遠赴沙頭角荔枝窩出席十年一屆嘅太平清醮誌慶。期間就有舞獅同舞麒麟表演，而今次麒麟似乎對佢唔錯，冇再將佢撞飛，反而甚為友善，咁樣係咪好意頭？
獲贈「有緣相聚」揮春
葉劉尋日喺Facebook貼文分享，話太平清醮誌慶係當地盛事，而且需要去到沙頭角禁區，搭半小時船程到達荔枝窩，攀山涉水咁滯。唔單止村民同好多嘉賓到場，亦有唔少海外華僑特登返嚟參加慶典，現場大大話話超過一千人，場面好熱鬧嘞！佢仲特別提到當晚有好多表演，包括客家功夫、神功戲等，但最開心都係舞麒麟表演時，麒麟表現友善，更送上寫有「有緣相聚」嘅揮春同迎送佢入村咁話。
唔少網民紛紛留言，有人話「葉太小心，唔好被麒麟撞到」、「姐姐小心又畀神獸撞親」、又有人提醒佢「唔好行近隻舞獅度啊，又撞走你就唔好啊」，睇嚟大家都好關心佢嘞！
卓妮