政情：與老婆鄭若驊惡運纏身 遇記者避談醜聞 野生捕獲 潘樂陶走後門鬆人

尋日中午約十二點四十五分喺銅鑼灣世界貿易中心會撞到潘樂陶去食午飯，本報記者上前追問佢公司涉嫌違法一事，但佢冇回應就直接行咗入會所，喺一個半鐘頭之後，即係約莫兩點十五分左右，佢終於食完飯，唔知係咪想避開記者提問，佢喺世貿會職員嘅「特別安排」下，竟然「走後門」閃人。

係乜嘢「特別安排」？咪就係該會職員將一塊圍板放咗喺走廊通道，旁邊有幾名職員護駕，記者只可以喺僅餘嘅罅隙見到潘樂陶走過，當時記者嗌佢，但佢冇答記者問題就走咗。正所謂「避得一時，避唔到一世」，始終都要回答傳媒嘅提問（口架），唔知佢幾時先肯面對呢？

轉頭又撞到正 靠Hea答解圍

話口未完，喺下晝約三點十五分，本報記者喺中環置地廣場中庭嘅餐廳見到潘樂陶，上前問佢擔唔擔心公司被調查事件，佢話依家調查緊，都唔係太擔心嘅。

佢太太鄭若驊早前喺倫敦被示威者包圍，混亂期間狼狽仆倒街頭，左手腕脫骹兼骨折，一度留英養傷，而日前亦已返港。追問鄭若驊現時嘅情況如何？潘樂陶話依家正在養傷，至於幾時復工，佢就着記者問律政司。再追問聖誕會唔會同太太外遊？佢話暫時冇打算。最後佢行出商場上的士離開。

旗下公司涉違反競爭條例

話說競爭事務委員會人員上個禮拜三帶同兩份搜查令，到潘樂陶旗下安樂機電設備工程有限公司嘅營業地點，以對若干行為進行調查，原因係競爭事務委員會有合理理由，懷疑安樂機電設備同其他公司喺（i）一項風冷式製冷機替換項目嘅設計及建造合同招標，以及（ii）自一五年十一月起喺香港簽訂嘅合同，已觸犯香港法例第619章競爭條例第6（1）條下嘅第一行為守則。

實際上，記者喺上個星期五朝早亦曾去到安樂工程位於北角嘅辦公室，但係就遲遲未見身為主席嘅潘樂陶嘅蹤影，就連佢旗下上市公司安樂工程嘅股份當日恢復買賣，佢都冇影。