中環出更：鍾國斌講古仔 暗寸政府效率低
香港嘅示威浪潮已經持續咗半年，唔少示威者聲言要「攬炒」，搞到中小企叫苦連天。作為立法會中嘅商界代表、議員鍾國斌（Felix）尋日喺Facebook上分享古仔，仲話係中小企嘅心聲，到底講咩呢？
Felix分享咗一個饑民搵村長求救嘅故事，事緣饑民因內戰而食咗半年西北風，搞到就快餓死要搵村長求救，點知呢個村長話譴責多幾次對方就會收手，又話相信場內戰好快自己完結，仲走去提醒饑民要關心身邊嘅人，特別獨居長者，因為天氣凍喎，真係相當離地喇！而呢位饑民其實只想有餐飽飯，點知反被要求提交建議書等資料，最終填填吓文件頂唔順死咗，只換來村長嘅深切慰問。
中小企靠政府死得
故事聽落相當諷刺，而當中嘅村長言論都耳熟能詳，事關經常出自政府嘅口中，一睇就知Felix借古仔彈政府冇對症下藥、做事效率慢喇，如果中小企齋等政府幫真係九死一生！
卓妮