政情：候任區議員聘議助新作風 M到社運罷工都批放假
新一屆區議會選舉議席大洗牌，唔少候任區議員都係新面孔。但正所謂「新人事、新作風」，呢班候任區議員喺聘請議員助理嘅時候都引入咗好多新元素，例如引入咗唔少特別嘅假期，當中就以荃灣區議會祈德尊選區陳劍琴同離島區議會東涌南選區王進洋嘅提議最為特別。
陳劍琴王進洋最出位
本身係註冊社工嘅陳劍琴一直都好關心性別平等嘅議題，佢更加曾經喺平等機會婦女聯席出任幹事一職。本身係女性又一直關心婦女議題嘅佢，當然好清楚在職婦女每個月都總有幾日唔方便，所以佢喺招聘議員助理嘅時候特別設立咗「月經假」（M假），強調經痛唔係有病，唔應該係請病假，而係應該名正言順請「月經假」休息。
至於一直關注社會運動嘅王進洋，佢提供嘅福利唔單止有勞工假、男士侍產假等，仲有一個好特別嘅假期叫做「社運罷工假」。不過，相信未來一眾網民仲會繼續發起一系列罷工行動，啲助理放晒罷工假嘅話，邊有人幫佢處理議辦嘅地區事務呢？