立法會財務委員會尋日審議政府早前建議嘅紓困措施，唔少議員亦擔心政府處理呢啲紓困措施好似派四千蚊咁，又混亂又慢，遲遲都落唔到市民口袋，甚至當場質問財經事務及庫務局局長劉怡翔，點解政府效率仲慢過私人基金，措施遲遲都落唔到地添！老實講，又難怪班議員咁鬧嘅，事關劉怡翔之前處理派四千蚊都搞到倒瀉籮蟹，民怨亦因此而起，希望佢真係吸取教訓，唔好重蹈覆轍，否則消怨氣變咗增怨氣就得不償失嘞！
