政情：主持會議講稅務優惠 鍾國斌乘機抽政府水
政府民望低迷，唔少人都想搵機會鬧政府，發洩一下心頭怒氣。立法會議員鍾國斌（Felix）尋日就把握到抽水機會，大嘲政府做事時機錯晒，唔知講中幾多人心聲喇！
立法會經濟發展事務委員會尋日開會，會議議題望落同一般市民唔係太貼身，好似講為船舶租賃提供稅務優惠。議員梁繼昌（Kenneth）就大數政府做得太遲，因為早喺六年前已有聲音要求稅務優惠，而兩年前講飛機租賃時，佢都有提出要做埋船舶，批評政府今時今日先去做係遲上加遲，又大嘆做咗好過無做。
話政府做事時機遲過人
作為委員會主席嘅Felix喺Kenneth發言後，就要將個波交畀官員回答，但佢把握到抽水機會，喺交時間畀官員前大嘆，話永遠遲做好過唔做嘅，尤其政府好多嘢嘅Timing（時機）都遲過人喎，搞到Kenneth都忍唔住喺位度笑，睇嚟係畀Felix講中心底話喇！