政情：屬鄉攞獎 侯強玩謙虛
上水鄉事委員會主席侯志強（侯強）向來都聲大大、牙擦擦，但早前喺鄉議局執委會上公布所屬嘅鄉有獎拎，佢竟然話要謙虛啲喎，唔通佢轉死性？
侯強喺會上匯報早排鄉議局主辦嘅馬拉松賽事結果，其中一個盃賽冠亞季軍分別為大埔鄉委會、沙頭角鄉委會同屯門鄉委會，唔見佢嘅上水鄉委會，好似有啲失威喎。
跑賽最踴躍參與 夠晒面子
不過，賽事仲有獎項畀各鄉競逐，就係「廿七鄉最踴躍參與獎」，一聽就知夠人多嘅獎喇，而侯強今次就笑住公布得獎者係「敝區」，仲話因為最多人參加喎，果然夠Face。而會上唔少人見侯強講得咁斯文都忍唔住笑，侯強講明要謙虛啲，唔通佢知今次所拎嘅係豬肉獎，唔敢太張揚？