政情:峯鴿修改「反修例」字眼 立會爆罵戰

立法會尋日召開大會,民主黨(白鴿黨)嘅議員許智峯(峯鴿)喺讀出質詢時,未有按原本質詢內容完全讀出,主席梁君彥要求佢重新讀出,而佢亦答應再讀出,但就將「反修例運動」嘅字眼改咗,梁隨即唔畀佢繼續讀出,並要求直接展開下一項口頭質詢,引起民主派議員不滿,其中佢嘅黨友涂謹申更喺座位上批評梁,其後被梁趕出會議廳,但涂未有離開,梁則宣布暫停會議。

何俊賢斥可能唔識字

喺峯鴿讀出質詢後,建制派議員何俊賢隨即就此提出規程問題,批評峯鴿「搞啲小動作」,更指峯鴿唔係做修訂,仲話峯鴿「可能唔識字」。峯鴿就話不論用乜嘢名稱嚟稱呼反修例運動,市民均會理解,希望建制派唔好咬文嚼字。梁君彥則解釋,根據《議事規則》,議員需要按草擬文本讀出,否則議員唔能夠發問。

會議暫停約一小時後復會,梁君彥話喺暫停會議期間,曾經同峯鴿會面,指峯鴿明白要求並希望再次讀出,因此經過考慮後,酌情容許佢再讀一次,但表明唔應該被視為先例,又提醒議員日後須按照已批准嘅草擬版本讀出質詢。

第一手消息請下載on.cc東網iPhone/iPad/Android/Windows Phone Apps