政情：佐敦滿目瘡痍 小明哭了
日前理工大學爆發大型示威衝突，有示威者打算前往支援，但警察早已經做好準備封晒路，示威者繼而選擇喺佐敦「開花」，導致路面滿目瘡痍。佐敦畀人打到爛晒，創作「小明」兒歌嘅李家仁醫生尋日喺Facebook貼文，話「見到佐敦情況，小明哭了！」對佐敦路面被路障堵塞、交通燈全毀感到心痛。
究竟佐敦嘅情況係點呢？我哋打電話問番小明，佢就話朝早九點幾落街嘅時候，見到馬路一地都係磚，而行人路嘅磚頭畀人剷起，導致一地都係沙，交通燈仲要畀人打爛晒，覺得好心痛。
市民幫手清磚 3個鐘恢復通車
佢話有工作人員幫手清理，亦都有熱心市民加入，大概三個鐘之後路面就恢復通車啦！咁佢有冇幫手清理？佢就話都有幫手執走幾舊行人路上嘅磚，話呢啲零碎嘅磚好容易Kick親人，失去重心跌倒就會受傷，特別係老人家添！另外，佢又提醒大家，如果踩到沙，去廁所之前要抹乾淨鞋底，唔係都會好容易跌倒o架！