中環出更：理大圖書館擴建翻新 撤回申撥
理工大學醫療教學大樓興建計劃喺上周五嘅立法會財務委員會被臨時抽起後，有傳因建制派不滿大學管理，阻攔大學嘅申請項目陸續有嚟。話口未完，工務小組委員會今日召開會議，本來排喺首項議程嘅理大圖書館擴建同翻新工程，財經事務及庫務局以理大校長需要檢視工程時間表為由撤回有關申請。
校方需檢視工程時間表
財經事務及庫務局局長劉怡翔尋日去信工務小組委員會主席盧偉國，話因為近日喺理大校園發生嘅事件，理大需要檢視工程嘅時間表，所以政府決定暫時撤回呢項議程項目，並會喺得悉檢視結果後，再決定幾時將項目提交畀工務小組委員會考慮。
盧偉國回覆我哋嘅查詢話冇聽過建制派要阻撓大學嘅撥款申請，相信係理大校方同政府溝通後才作出撤回申請嘅決定，由於理大受到嚴重破壞，要先處理好校內嘅復修後，才處理擴建圖書館嘅事宜。
其實，中大亦申請喺大埔興建一座教學科研綜合大樓，用以提升醫學院校區發展嘅撥款申請，本身已經排咗喺上周五財委會第三項議程，亦由劉怡翔負責，然而本周五財委會嘅議程仲未定，未知到時係咪都會排上議程，定係又會畀人抽起呢？
卓妮