中環出更：帶學生到北極成校史 何建宗：心情激盪
香港培正中學創校一百三十周年校慶，早前舉行咗連串嘅慶祝活動，而極地專家何建宗都有參與，當然喇，因為佢身兼培正中學校監，仲話心情激盪添！
乜嘢令佢心情激盪呢？當然同佢醉心嘅極地考察有關，事關佢喺舊年親身帶隊，同培正中學生去北極考察，而其中一張相就擺咗喺校園內，記低為培正校史吖嘛！極地工作咁艱辛，嗰次同班同學仔一齊去體驗生活，仲係全港首間中學去北極添，當然係好難忘嘅事喇！
而喺校慶壓軸嘅活動，即係晚宴後，何建宗當晚就過橋去澳門，主持有關極地科研的培訓課程，佢仲話依家透徹明白，校歌中「教育生涯慘淡營亅嘅深意喎。
培正晚宴 天文學家郭新捧場
其實舉行校慶晚宴時，正正係因為示威行動造成交通癱瘓，教育局宣布停課，雖則係咁，但無減校友同教職員對學校嘅支持，當晚筵開逾二百八十席，場面鼎盛，而校友、國際著名天文學家郭新都有到場。
許華傑：身為「培正仔」感自豪
香港中華出入囗商會副會長許華傑（Michael）都係培正校友，但因為當日唔喺香港，所以去唔到校慶晚宴。佢話依家香港咁亂，雖然喺機場博覽館咁遠，都仲有咁多校友去，非常之難得。
Michael早前喺Facebook上載咗張相，仲貼文話「Love this培正一百三十周年紀念棒球外套」，佢話喺網上訂嘅。佢覺得以學校出產嘅衫嚟講設計得好靚，可以着得出街，佢仲話雖然佢由小學讀上去，直至中三，但對學校好有歸屬感，又話當年讀書嗰陣，一班同學仔都對身為「培正仔」而自豪。
卓妮