政情：公民講場：新東居民怨聲載道 政府出船慢人幾步

有示威者於上周一發起三罷行動，仲癱瘓咗新界東嘅交通，唔單止東鐵要停駛，吐露港公路等大埔出市區嘅道路都被雜物堵塞，大埔頓時變成孤島，居民怨聲載道。後知後覺嘅政府就貫徹慢幾拍嘅作風，去到三罷行動嘅第五日、即上周五先至安排渡輪畀市民來往大埔至烏溪沙，仲遲過喺封路冇耐就載客嘅船家，而且只得兩艘船，市民等兩小時都未上到船，當然被市民鬧到飛起，有人直情話，若果一百分係滿分嘅話，政府只係值得畀十分。唔知作為政府第二把交椅、成日話民生無小事嘅政務司司長張建宗拎住呢張成績表會點諗，但如果港人等佢出招，香港就真係死得喇。