政情：交通癱瘓 鄭松泰自爆放人飛機
近排全港多區嘅交通都受堵路影響，好多人出門都好唔方便，立法會議員鄭松泰更自爆因交通問題而「放飛機」添。話說鄭聽到有朋友日前為咗去飲，要由大埔踩單車去沙田，之後再踩單車返屋企後，就好佩服朋友來回用三小時去飲一餐，而佢自己本來就約咗人尋日朝早擺街站，但認為晨早流流踩單車未免太過有鄉土情懷喇，加上佢冇單車，所以就決定改行程「放飛機」喎。
晨早流流唔想踩單車
鄭原定尋日朝早去大埔運頭塘做地區工作，不過因為尋日早上吐露港公路未開通，新界東嘅鐵路同巴士都暫停服務，所以住沙田嘅佢只有兩個方法去運頭塘，一係踩單車，一係去馬鞍山搭船。不過佢兩樣都冇揀，反而揀咗去天水圍做地區工作。佢就解釋話，沙田可以經屯門公路去天水圍，會方便一啲，而佢尋日途中亦完全冇塞車。
鄭又話，平時返立法會會早四十五分鐘至一小時出門口，依家就要預早兩、三個小時先至返到去，好彩佢嘅女兒係喺屋企附近上BB班，所以都冇乜受影響喇。