政情：袁莎妮斥政府無能 漠視民意
政務官出身、曾出任運輸及房屋局副秘書長嘅袁莎妮（Shirley）離開咗政府九年，但一直都好關心社會時局，不時喺社交網站對政局作出點評。唔知係咪因為最近辭去香港總商會總裁一職之後更無後顧之憂，呢排佢喺社交網站上嘅貼文不時觸及呢幾個月嘅社會亂局，日前仲大鬧依家嘅政府無能，漠視民意添。
Shirley話，現屆政府控制唔到現時嘅社會亂局，解決唔到依家社會出現咗嘅巨大分歧，直斥政府無能，漠視民意。佢仲提到，喺全世界任何地方出現呢種情況嘅話，一早就已經有人要問責下台，唔會仲喺度獻世，佢仲以英文反問本港曾經引以為傲嘅權力制衡到底去咗邊。
籲沉默的大多數發聲反暴力
Shirley之後又話，呢五個月來本港好似無政府狀態咁，而局勢仲一直喺度急劇惡化緊，佢呼籲社會上沉默嘅大多數要發聲，要話畀大家知社會反對暴力、痛斥暴力。同時佢亦再寄語現屆政府，唔應該繼續錯判形勢，而係要努力協助局勢降溫，警告政府再喺度自欺欺人只會累死香港。