政情：黃定光轉用呼吸機 告別睡魔
經常被影到喺立法會會議期間瞓覺嘅進出口界議員黃定光（象哥）近排炯炯有神，好似精神好咗，究竟點解？原來象哥近排少咗捱通宵，多番啲時間瞓覺，不過佢就話因為患有睡眠窒息症，早幾年瞓覺都提心吊膽，驚自己分分鐘窒息咁話。真係大吉利是。
患睡眠窒息症 分分鐘冇命
象哥自嘲瞓覺啲鼻鼾聲好似「交響樂」，佢早幾年懷疑自己患有睡眠窒息症，所以去咗瑪麗醫院做檢查，測試結果係每個鐘有六十幾次機會窒息，佢聽完都話，真係「分分鐘窒息」，好得人驚。之後象哥就聽醫生建議，將兩支尼龍條置入鼻腔，令氣管唔會閉塞。不過用咗三年之後，兩支尼龍條就廢咗，惟有轉用呼吸機，希望可以改善問題。
象哥又話，依家啲呼吸機有得調校濕度同溫度，功能多咗，令佢可以舒服到一覺瞓天光，夜尿都唔使屙，每日返工仲炯炯有神，從此告別睡魔。不過點解間中都仲見到佢喺開會時瞓覺呢？佢就話有時通宵做嘢冇時間瞓，開會嘅時攰咪休息吓，唔覺得有乜嘢問題喎。開會瞓覺仲大條道理，真係冇佢符喇。