政情：5議員未提過議案 建制派賴拉布示威

立法會議員可就唔同政策及議題提出無法律約束力議員議案，以喺大會上辯論，不過因議員人數眾多，提出辯論嘅機會就要以抽籤決定。今屆任期剩下不足一年，仍有九名議員未提出過議員議案，其中包括負責主持立法會大會會議嘅立法會主席梁君彥，以及三名因為唔好彩、抽唔中籤嘅「黑仔王」，但有五名議員保險界陳健波（波哥）、陳凱欣、區諾軒、地產及建造界嘅石禮謙，同代表鄉議局嘅劉業強就係從未提交過議案去進行抽籤。

波哥話喺財委會用咗好多時間

身兼立法會財務委員會主席嘅波哥話，一直都放咗好多時間處理財委會事務，本身諗住最後一年任期先提出同保險相關嘅議案，不過又唔好彩撞正持續嘅示威活動，搞到唔知要排到幾時先提出到。佢又話，呢幾年立法會好多拉布，每年大會連本身有法律效力嘅項目都處理唔切，積壓咗好多個無法律效力嘅議員議案，真係唔知幾時先處理到喎。唔知呢個理由大家點睇喇。

有議員指將失議席 抽中冇用

而去年十一月先加入議會嘅陳凱欣話，自己各方面嘅工作一直按部署進行，連議員議案都準備咗好幾個範疇，不過因提出議案嘅機會珍貴，希望好好善用，所以由宣誓就職到依家差唔多過咗一年，都仲喺度諗緊提出邊個議案好。同樣去年先入議會嘅區諾軒就話，上個會期時段已用盡，今個會期本來可申請，但又因為自己就嚟失去議席，分分鐘提出完又抽得中嘅時候，已經唔再喺立法會喇喎。

石禮謙就話，依家無約束力議案嘅意義已經唔同咗，對政策影響好小，所以寧願用多啲時間喺其他方面做實事，唔認同唔提出動議就代表議員懶咁話。劉業強就稱，自己準備咗兩年，一直等緊官方公布統計資料，之後先可提出到有關鄉郊發展嘅動議。做足準備先去提出議案係好事，不過唔知幾位議員仲記唔記得自己任期就快完呢？