中環出更：多區清路障 漢奸黎旋即又攪局
本港出現前所未見嘅暴力示威浪潮，持續逾五個月都未停止，過去一周嘅暴力示威又再升級，多條主要幹道都被堵塞，本港交通陷入「半癱」狀態，情況喺尋日先得到改善，多區路障被移除，不過被內地官媒狠斥為「叛國禍港四人幫」之首嘅壹傳媒黎智英（漢奸黎）旋即又攪局，似乎想繼續搞亂檔。
四日內第二次密會
漢奸黎過去一周多次喺其何文田寓所同民主派人士密會，尋日下午又派出七人車管接管送，接載因違法佔領行動（佔中）案被判囚八個月，但獲緩刑兩年嘅民主黨前主席李永達（高達）、同樣喺佔中案被判囚八個月嘅社民連副主席黃浩銘以及工黨立法會前議員李卓人。
三人喺下午三時許已抵達漢奸黎寓所，高達坐喺副駕駛座，後排位置同樣鬼鬼祟祟咁落咗窗簾，好似唔見得光咁。三人最終逗留約兩小時，直至傍晚再乘搭漢奸黎嘅七人車去到旺角警署外，黃浩銘獨自沿彌敦道走人，高達同李卓人則乘搭港鐵離開。本港嘅混亂情況尋日先稍稍有所改善，但漢奸黎已急不及待喺四日內第二次與高達、李卓人密會，次數如此頻密，唔知又有咩搞作喇。
卓妮