中環出更：行行出狀元 鍾偉平：炒菜可以炒出一片天
好多人覺得從事餐飲業係工時長、假期少、成日要留喺熱廚房，最慘仲要冇乜向上游嘅機會，不過稻苗學會永遠榮譽會長鍾偉平就話，呢啲只係行外人嘅誤解，正所謂行行出狀元，就算廚房佬都可以靠炒菜炒出一片天咁話。
稻苗學會早前搞咗個畢業禮，向新一屆稻苗培植計劃嘅畢業學生頒發證書同獎學金。有關計劃目的係鼓勵行內年輕人進修，從而喺業內唔同崗位向上游。鍾偉平喺活動上話，好尊重同佩服同時兼顧工作及進修嘅同事，回想自己都係廚房仔出身，入行時覺得只要學好點炒餸就得，冇諗過升到上廚房大佬後要管理晒廚房入面嘅大小事務，嗰陣先發現原來係另一門學問。佢仲話好支持同事不斷進修，因為咁先可以周身刀張張利，機會嚟到自然就會得心應手。
徐汶緯：論文寫到飯都冇胃口食
學會主席徐汶緯都係其中一屆畢業生，佢回憶起當年修讀一年制課程嘅辛酸史時話，要將所有嘢一年內完成真係唔容易，要兼顧工作讀書，又要擠時間同同學完成項目，既要做資料搜集，又要寫論文，最難嘅係要向教授做簡介，開頭諗住頭幾次被打回頭都正常，點知差不多到學期尾都未過到關，真係擔心到飯都冇胃口食。不過佢經多番努力後，都成功得到教授嘅認同，順利畢業。
黃傑龍：唔怕員工學完嘢被挖角
學會會長黃傑龍（Simon）亦係計劃早期嘅畢業生，雖然本身係MBA畢業，但仍然覺得唔夠，所以就參加咗呢個計劃。Simon話，當年計劃畀佢最大嘅得着係認識咗好多同業，擴闊咗自己嘅人脈，亦可以喺其他人身上學到好多生意之道，所以佢都鼓勵自己嘅員工參加計劃，仲會喺工作時間上作彈性安排。今屆畢業生有十幾位都係Simon員工，問到怕唔怕佢哋學完嘢被挖角，佢就用球會做比喻，話球會要攞冠軍就一定要提升球員質素，冇理由驚球員被撬走而放棄爭聯賽冠軍喎。
卓妮