山路當賽道 私家車撼柱自炒
【本報訊】昏暗的山路往往是自命「高手」的駕駛者的挑戰場。近日有車Cam就拍攝到一架私家車在山頭爬頭，「頭搖又尾擺」如入無人之境，不過最後卻高速失控，直剷路柱，車頭嚴重損毀外，亦惹來網民嘲笑，「型到盡頭便是X」。
攝車爬頭 高速過彎
現場是荃灣城門道，事發於前晚約七時，當時拍攝的車輛沿象山邨東路駛入城門道，突然一架藍色私家車從右邊攝入爬頭，由於現場有不少車輛停泊，令原來狹窄的山路行車空間更小，不過私家車似乎一於懶理，繼續以高速「見彎過彎」，不過行至一分鐘左右，私家車突然失控，雖然司機一度扭軚救車，但最終「搶救無效」，直剷向右邊路柱，車頭四十五度角彈起再跌回地面。意外後，私家車頭冚摺起，冒出大量白煙，車頭嚴重受損。
意外並沒有惹來網民的同情，反而認為私家車司機咎由自取，「大快人心」、「認真，係咪十六歲冇牌偷老竇架車去揸呀？」亦有人諷刺說：「真正嘅車手，未到終點都唔會停」。