政情：十幾年賓主 蔣麗芸同私人司機好老友
打工仔如果遇到好老細係緣分嚟，掉番轉老細請到一個稱職嘅下屬都係一種福氣，好似立法會議員蔣麗芸（Ann），佢嘅私人司機車佢返工車咗十幾年，由廿幾歲做到依家四十幾歲，開頭雙方嘅關係仲要唔係咁好。咁點解又可以捱到十幾年呢？
阿Ann憶述當年司機可能年少氣盛，差唔多日日都話唔撈，佢好唔甘心咁後生做司機，話好快搵到新工，畀阿Ann大番佢轉頭，話要一個月通知或者賠一個月糧，仲同佢講好快就會搵到新司機，後尾阿Ann唔忍心見對方無工開，叫對方做住先，之後做做吓多咗人生歷練，賓主關係維繫到依家，仲好過以前添！阿Ann又話會當佢係朋友，不斷開解佢，教佢人生哲理，彼此關係都改善唔少。
勾起後生時半工讀回憶
講講吓，亦勾起佢後生喺外地邊讀書邊打工嘅回憶。佢話以前喺日本讀設計，識得打招呼嘅基本日語，有位日本客人發覺佢識講日文，於是邀請佢喺日式餐廳打工，喺佢好努力、好畀心機做嘅情況下，之後更由侍應升到去主管嘅職位添！