中環出更：陳恒鑌見官激心 捽爛眼鏡
立法會議員陳恒鑌（Ben）近日換咗新眼鏡，一改維持多年嘅黑框眼鏡造型，變成透明框眼鏡，令人有耳目一新嘅感覺，佢話呢個形象夠配合減肥後嘅佢，睇嚟非常滿意喇！
不滿政府工作
阿Ben透露，上星期同政府官員會面，直言呢排政府做嘢令人激心，而會面期間抹眼鏡，捽捽吓就搞到眼鏡框嘅鼻樑位置斷開咗，睇嚟佢用行動說明有幾激氣喇！究竟見邊個官激成佢咁嘅樣呀？
眼鏡爛咗點算？阿Ben惟有用超能膠，暫時將斷開嘅兩邊黏合頂住檔，直至配到新眼鏡，亦都順手配多副做後備。
佢話自己維持黑框眼鏡多年，但唔怕換咗眼鏡後街坊唔認得佢，笑稱就算自己化灰，街坊都唔會唔認得佢，而且有唔少人開初都話睇唔慣佢戴呢副新眼鏡，但慢慢睇慣咗仲讚佢呢個樣後生咗，而自己都感覺青春咗喎。聽得出佢好滿意喇！
卓妮