政情：貝鈞奇日行二萬步好貼地
踏入十一月，秋高氣爽，絕對係外出登高或進行戶外活動嘅好時機，連香港足球總會主席貝鈞奇都話，最近天氣好咗咁多，涼浸浸加有少少太陽，行山絕對係最佳之選，仲話大家都知道佢鍾意行路，仲要係日行二萬步o架，認真犀利，佢建議大家趁天氣好，真係要多做運動。
貝鈞奇話，佢一得閒就會約朋友行山，如果唔得閒都會搵機會行吓，例如喺跑馬地屋企行落灣仔再行去中環公司，天氣舒服咗，着住件西裝都唔會身水身汗，仲話對皮鞋換咗軟身鞋墊，好舒服，唔怕行得辛苦添。佢一有機會行就把握機會，無論飲早茶、開會、食飯等都盡量唔開車，仲話慢行絕對唔會損耗關節健康，叫大家唔使太過擔心。
指行出去先知社會發生咩事
佢仲講到，行路唔單止運動多啲，仲可以「貼地」啲，睇吓依家社會發生咩事，了解市道如何，觀察民情，好似最近空置舖多咗，飲食業好難做，大家都好頭痛，如果唔係行出去都唔會知，仲話希望社會快啲回復安寧，早啲皆大歡喜咁話。