政情：蔣麗芸提名選副主席 慢必嚇一跳
立法會人事編制小組委員會尋日選舉正副主席，建制派周浩鼎當選主席，但喺選副主席時竟然出現一個奇怪現象，就喺建制派嘅蔣麗芸（Ann）竟然提名泛民嘅陳志全（慢必），連慢必都嚇咗一跳話多謝佢喎，最後慢必當選，一班建制派仲恭喜佢添！
蔣寄語唔好拉咁多布
上屆人事編制小組委員會正副主席都係建制包攬嘅，今次放畀泛民，唔通係大和解？抑或係畀慢必嘅死亡之吻？但阿Ann就話提名慢必係因為見泛民無人肯做副主席，但又唔提名慢必，既然係咁點解唔畀個機會慢必呢？加上佢覺得慢必係一個肯睇文件嘅人，正副主席好需要處理文件o架嘛，咪提名佢囉。佢都希望慢必做咗副主席之後會喺另一個層次睇嘢，可以乖啲，唔好拉咁多布。
