政情：建制反對 鄭松泰撤回唔到口頭質詢
立法會議員一向可以喺立法會上提出質詢，不過就需要一早作預告。通常議員都會把握機會喺會上向官員提出質詢，立法會議員鄭松泰尋日喺會上決定放棄呢個難得嘅機會，卻因有建制派議員反對，最終都係撤唔成。
離開會議廳 建制議員代質詢
因為修訂《逃犯條例》觸發社會爭議，立法會大樓亦因大樓遭破壞，所以亦提早放暑假，本身喺七月份要審議嘅議程亦順延到復會後先可以審議。鄭松泰嘅口頭質詢係關於修例對香港造成嘅經濟影響，但佢指政府決定撤回修例，而商經局對佢提出嘅質詢，有關回覆本末倒置，將造成亂局嘅責任畀香港人同示威者，所以佢決定喺會上撤回口頭質詢，話唔畀政府為自己嘅暴行搵下台階。
不過，立法會主席梁君彥話如果議員要撤回質詢，需先睇吓有無議員反對，當時就有幾位建制派議員舉手反對，鄭松泰見狀亦步出會議廳，連問都唔問。質詢撤唔成，雖然鄭亦步出會議廳，但唔代表條質詢作廢，最終由在席最資深嘅民建聯李慧琼代為提出質詢，仲追問商務及經濟發展局局長邱騰華會唔會向部分機構慰問，但邱回應時就話政府唔會為個別企業制訂措施，仲話相信執法機關會跟進喎。