政情：工務小組選副主席 何俊賢攔截朱凱廸

話說選舉副主席時，陳志全（慢必）就提名朱凱廸。咁就有啲奇怪嘞，事關在任副主席都係泛民嘅莫乃光，而建制派班長廖長江提名莫乃光後，莫乃光就扭扭擰擰，又話想支持朱凱廸做副主席，所以要考慮吓先。

建制提名莫乃光，根本就係放個位出嚟畀泛民，亦係畀莫乃光連任，但慢必提名，莫乃光又話想支持朱凱廸，好明顯係想推朱凱廸上位喇！建制派一向都唔鍾意朱凱廸，甚至封殺佢做事務委員會嘅正副主席，見到泛民竟然有此舉措，梗係要出招喇！

跟住進出口界嘅黃定光（象哥）就急急腳提名高佬賢選副主席，擺明係見勢色唔對喇！建制搵高佬賢攔截，已經表明係唔畀朱凱廸過關，甚至係搶番莫乃光個位，建制派包攬正副主席。

莫乃光扭扭擰擰 最終仍連任

泛民亦知道象哥想點，之後慢必又再提名莫乃光，話畀多次機會佢考慮喎，跟住建制派葛珮帆（EQ）和議，就連EQ嘅黨友周浩鼎都叫莫乃光接受咗先啦！最後莫乃光就話是但啦，接受咗廖長江嘅提名，當選副主席。

象哥事後都話無諗到得朱凱廸一個畀人提名，形容泛民平時啲提名都好似胡椒咁噴晒出嚟，今次就竟然得一個？加上莫乃光又扭扭擰擰，話要考慮吓接唔接受提名，佢覺得高佬賢好過朱凱廸，所以提名高佬賢。

老實講，建制都畀晒機會莫乃光，否則泛民為咗推朱凱廸上位，可能連副主席位都冇埋，咁就捉蟲喇，泛民詭計失敗，而建制就成功封殺朱凱廸喇！

傾工程撥款 出咗開會時間表

另外，工務小組委員會啱啱選出正副主席，話咁快就出咗開會時間表，嚟緊三十一日就會開會，十一月亦會加開多次會議。主席盧偉國話其實暑假前已經有項目上咗工務小組，但當時未夠時間審議，所以咪會喺近期排上今年度工務小組嘅議程上面囉。佢話目前主要都係傾啲工務工程撥款，因為財委會滯後喎。