新一份施政報告發表後，大家都話係歷來最薄嘅一份，得嗰二十頁，仲要係靠房屋及土地政策做主打，其他政策就放晒喺施政報告「附篇」內，令人覺得其他政策好少着墨。環境局局長黃錦星尋日出席活動時，就唔認同環保政策着墨少，仲話有關環保嘅新政策新措施有成二十幾個，當中包括優化郊野公園部分設施、推出鄉郊保育資助計劃，撥款五億元幫助活化及保育偏遠鄉郊等。雖然佢賣晒廣告，但政策放喺「附篇」，即代表唔係最重要囉，否則就係特首懶得讀咁多內容喇。
