政情：陳肇始教減重 拍手都當運動
食物及衞生局局長陳肇始喺促進公眾健康領域素有研究，上月出版嘅《公務員通訊》都專門有幾版介紹佢啲政策同研究，甚至分享吓對公共衞生嘅睇法。
叫用意志力抵抗食物引誘
陳肇始就講咗四個可自我掌控嘅風險因素，例如吸煙、飲酒、運動和飲食，佢話自己不煙不酒，會趁閒時做吓運動，仲建議同佢一樣忙碌嘅同事可以進行「零時間運動」，好似坐喺度嘅時候，可提起雙腿，鍛煉吓腿部肌肉，又話拍手時，只要大力一啲，就可以消耗熱量，唔通咁樣可以減到拜拜肉？
另外，陳肇始仲提到飲食方面，佢好少食肥膩或唔健康嘅食物，仲要識得節制咁話，又叫大家要用意志力抵抗唔健康食物嘅引誘，如果真係抗拒唔到，就買最細包嘅頂吓癮喎。