政情：侯志強黑超Look 老婆嫌乞人憎

好多名人都會戴住副太陽眼鏡出街，有啲人就怕被人認出，有啲人就係想自己型啲，上水鄉事委員會主席侯志強就一定係後者嘞。佢尋日出席一個會議時，都戴住副太陽眼鏡現身，嗰副超係白色眼鏡框，真係相當特別。佢話，老婆嫌佢戴住副超個樣乞人憎，佢就覺得冇所謂，冇害到人就得啦，仲話戴住超，其他人就特別記得佢喎！

侯志強尋日心情相當好，戴住副超，舉高隻手，周圍同人打招呼。佢講起，呢副超係兩、三個月前朋友送嘅，一共送咗幾副畀佢，佢就擺喺車度，隨手攞到邊副就戴邊副，都冇諗過點襯衫。擺定幾副超咁多，睇嚟真係佢日常必備嘅物品嘞。

不過，佢話，自己戴住副超，搞到孫仔覺得唔開心。唔通嚇親個孫？佢話，因為戴完之後，孫仔覺得有型過自己，於是妒忌佢，覺得唔開心喎！