政情：八網難逃：林超英以草為喻 冇解決唔到嘅艱難
天文台前台長林超英愛好天文，亦好鍾意影相同行山，近日佢喺社交網站「一日一花」，每日都貼一張花花草草嘅相介紹大自然，仲會寫埋呢啲花草嘅中英文名稱，以及拉丁名，真係好似上咗一堂生物堂咁。不過，佢前日貼飛揚草嘅相時，就唔止介紹花草，亦有感而發，講起冇解決唔到嘅艱難喎。
有捱過冬天嘅辦法
林超英話，秋盡入冬，溫度未降，但雨水已減，乾旱漸漸進入植物嘅生活，飛揚草根部少咗滋潤，葉子上亦展現出紫紅色，經過千萬年與天地同行，飛揚草自有捱過冬天嘅辦法。
佢有感而發，講起人類在世已有二百幾萬年，同樣都有與環境變化同行嘅天然韌性，勉勵大家要對自己有信心，冇解決唔到嘅艱難咁話。相信林超英都係對近日嘅連串事件有啲感觸，想勉勵一下大家啦。