政情：政府電視講話 邱騰華楊潤雄冇影
特首林鄭月娥尋日就全港暴力事件發表電視講話，一班問責官員齊齊做布景板，粒聲唔出咁企喺度，全部都神色凝重咁，相信都係想表達一班高官有幾咁唔認同暴力事件，以及問責班子有幾咁團結之類。點知，一班司局長就連做布景板都唔齊人，商務及經濟發展局局長邱騰華同教育局局長楊潤雄都冇影。真係唔知當唔當呢個班子團結好嘞！
晏晝拍攝都約唔齊人
呢段電視講話喺尋日下午發表，聽聞喺中午嘅時候拍嘅，成個過程好簡單，好快就拍完，拍完冇幾耐就播出嘞。最耐人尋味嘅反而係兩個局長失蹤，唔知係咪有咩玄機？
商經局回覆話，邱騰華因有其他要事，未能參與拍攝。教育局就回覆話，楊潤雄喺拍攝期間，由於另有公務，所以須先行離席。既然明知約唔齊人，唔知下次仲係咪應該約呢個時間呢？