政情：梁志祥屯門議辦遭打爆玻璃
反對修訂《逃犯條例》引起嘅風波未有因政府撤回條例而平息，全港多區近日都有連串嘅暴力示威衝突，示威者去到好多建制派議員嘅地區辦事處大肆破壞，甚至縱火，立法會議員梁志祥位於屯門置樂花園嘅議辦亦唔能夠幸免，佢話鐵閘無被撬開，入面啲野完整無缺，但玻璃門就疑被人打爛晒，損失幾千蚊。
梁志祥話辦事處係首次畀人破壞，亦因為疑人喺破壞前開晒遮，遮住閉路電視，所以就影唔到到底係乜嘢人做嘅，佢話已經報警備案，警方話會調查事件，而佢就慨嘆比其他黨友，佢算係好彩嘅一個，因為屯門區議員曾憲康嘅議辦試過三次遭人刻意毀壞，入面嘅電腦設備同傢俬全軍覆沒，要花費起碼兩至三萬蚊買番先搞得掂。
鬧爆泛民冇譴責暴力行為
佢又斥泛民主派議員由反修例遊行至今淨係一味鬧政府同警方濫用武力對待示威者，從來都冇譴責暴力行為，一句批評說話都冇。其實佢都有佢嘅道理嘅，唔知泛民又幾時有人會出聲譴責吓呢啲行為呢？