中環出更：示威密集 黃英豪倡搞網絡安全法
近日有唔少遊行示威都喺網上平台發起同組織，好多人都關注新媒體帶來嘅影響，就連立法會進出口界議員黃定光（象哥）最新一份議員通訊都有提到呢件事，不過就唔係象哥自己提起，而係當中有一篇「業界專訪」，特別訪問咗香港中華出入口商會副會長黃英豪，而黃英豪提到建議搞網絡安全法喎。
黃英豪喺訪問中提到近日香港政局，指繼立法會七月被破壞後，好多重要政府建築物都相繼受到衝擊，認為示威者可以咁高效率，箇中原因係目前網上發放訊息完全無限制同管制，部分通訊程式或平台有可以容納上限二十萬人嘅群組，所以一次過號召大量示威者上街並無難度，而網絡安全法正正就係針對呢點加以限制。
認難有共識 立法需時長
佢指出，網絡安全法有助警方掌握更多訊息，包括追尋煽動者、發動者等，不過佢都講明，如果要實行並不容易，相信社會上好難達成共識，加上立法都需要好長時間。照咁睇嚟，就算網絡安全法有用，都無法喺短時間內實行，黃喺呢個時候提出嚟，最終發揮到幾大成效就唔知喇！
卓妮