政情：陳沛然做咗三年議員 終於有病人認到
醫學界立法會議員陳沛然（Pierre）尋日喺社交網站自爆好開心，皆因佢尋日朝早幫病人覆診嗰陣，病人認出佢係議員。之但係Pierre自今屆立法會換屆成為議會新丁，至今都做咗三年議員喇喎，竟然依家先畀人認到，知名度似乎麻麻，都唔知開心定唔開心好喇。
Pierre形容自己尋日全日都充滿驚喜，話說朝早有病人突然同佢講：「覆診咁多次，最近先發現你原來係議員，好開心啊！」仲話病人不藥而愈，咁犀利都有嘅咩？佢又話，下午佢徒孫第一次由頭到尾自己完成膽管鏡檢查，佢就將病人嗰句「好開心啊！」轉送畀徒孫。佢仲話，病人好番，佢就老懷安慰喇。
多重身份 包括「足球員」
不過佢做咗三年議員，竟然冇人識，唔知係咪因為佢最近經常去示威場合救人，所以先有人認得佢呢？有網友就話，要多謝佢帶畀大家歡樂同永遠嘅正能量，又有人講笑話如果個病人發現佢係足球員，佢應該仲開心。睇嚟佢下次要話自己正職係足球員，興趣係做醫生外，仲要多啲介紹吓其議員身份喇。