政情:莫乃光建議雷達取代鏡頭 幫智慧燈柱救亡

早前智慧燈柱因為被質疑設有人臉識別系統而引起軒然大波,之後示威者喺觀塘遊行期間仲拆除同肢解咗多支智慧燈柱。近排社會氣氛緊張,公眾對智慧燈柱嘅視像鏡頭有疑慮,政府解說多次都冇被接受,立法會議員莫乃光就建議政府用雷達代替或取代監視鏡頭,仲話可以順手解決供電問題添!

話唔會涉及私隱問題

幾十支智慧燈柱被打殘之後,藍牙供應商話幫觀塘一帶嘅五十支燈柱做埋支援後就唔會再提供部件,餘下三百五十支就仲未知點解決。莫乃光喺社交平台話不如轉用雷達取代鏡頭,雷達可以訓練AI模型辨認唔同物件,運輸署就算唔用鏡頭都可以分辨出唔同車輛,從而得到足夠嘅交通資訊,又完全唔會涉及私隱問題,亦唔會畀人感覺到監視嘅感覺,咁就可以釋除市民嘅疑慮。

佢話雷達系統仲可以節省成本,依家部分燈柱淨係可以夜間供電,日間供電唔穩定,而科學園依家其中一支燈柱就利用雷達偵察車輛違泊,亦解決咗供電問題。

第一手消息請下載on.cc東網iPhone/iPad/Android/Windows Phone Apps