政情：保良局鍾情前高官 王倩儀退休後再就業
前高官一直都係私人機構嘅搶手貨，好似保良局咁，半年內就請咗兩個前高官。繼上次請咗律政司司長前政務助理陳可恩之後，環境局前常任秘書長王倩儀啱啱喺前日履新做行政總監嘞！保良局咁鍾意請前高官，唔知係咪因為佢哋熟政府架構，知道門路，搞活動就可以得心應手啲？
出任行政總監
王倩儀做環境局常秘都做咗十年，喺二○一六年退休，三年後再重出江湖，唔知保良局有乜嘢咁吸引呢？不過，離職公務員就業申請諮詢委員會對佢再就業都有啲規定，例如佢唔可以用或者披露喺政府任職期間知道嘅所有機密同敏感資料，亦唔可以親身參與保良局環境同自然保育基金計劃項目嘅申請程序，同埋佢唔可以參與競投任何政府土地物業等等，但係同非牟利福利或者教育服務有關嘅就可以除外。
其實，陳可恩都喺今年二月做做吓律政司司長政務助理嗰陣，轉咗去保良局做。其時有人估佢會出任行政總監，事關呢個位已經懸空咗好耐，點知佢原來係做副行政總監！