中環出更：時興智能手錶 區宇凡：對機械錶衝擊前所未見
科技既可帶來便利，但亦會顛覆舊有事物。投身鐘錶業多年嘅香港鐘表業總會顧問區宇凡，雖經歷過行內唔少變遷，但佢覺得近年對行業構成衝擊嘅，係時下愈見流行嘅智能手錶。
區宇凡憶述十多年前，手機主要以通話為主，其他附設功能非常有限，對於傳統手錶巿場嘅挑戰近乎零，但隨着通訊技術同軟硬件嘅功能日趨强勁，能夠同手機功能互為配合嘅智能手錶，對比於單純以報時為主嘅傳統手錶，其衝擊之大可謂前所未見。佢話傳統手錶雖有其價值，但產品就必須走時尚品味同多功能呢兩條發展路線，先可以應付智能手錶嘅挑戰，而總會另一名顧問黃麗嫦對此亦深有同感。
錶行董事總經理黃錦成就認為智能手機嘅延伸，嚴格嚟講只屬於一種穿戴裝置，既唔似得機械式手錶咁富藝術感，亦未能做到電子錶嘅潮流氣息，所以佢唔覺得智能手機及其穿戴裝置可以完全取代傳統手錶嘅位置。不過，為咗迎合科技潮流，佢亦研發植上電子零件嘅機械式手錶，既有機械式手錶嘅特色，又可以將心跳同步數等資料轉送往智能手機。
香港青年工業家協會執行委員莫慕潔就留意到香港近年興起長跑同行山等運動潮流，以致佩戴智能手錶嘅人愈嚟愈多，此長彼消之下，手錶指針同錶面等傳統手錶所必須嘅零件，需求就日益減少，佢認為傳統手錶若視作一種衣飾配件，亦有其存在價值。
劉燊濤：培訓課程要與時俱進
鐘錶業行業培訓諮詢委員會委員劉燊濤就話傳統手錶市場正遭智能手錶逐步蠶食，儘管業界有公司試圖轉型，但傳統鐘錶生產商一旦涉足智能手錶嘅研製，就會礙於電子科技而倍感困難，所以佢認為職訓局嘅培訓課程要與時俱進，令業界都可以追上科技潮流。
卓妮