中環出更：面中風戒煙酒 李鋈麟生活檢點咗
東華三院前主席李鋈麟早前塊面中風，唔知依家康復情況點呢？卓妮日前就喺中環ifc見到佢喺一間電話舖出現，原來佢預約咗維修電話，望埋去見佢精神好咗同明顯Fit咗，走埋去同佢打招呼，問佢電話乜嘢事？佢話螢光幕有問題所以嚟check吓。
問依家身體點呀？李鋈麟話好好多喇，唔單止定時去東華做針灸，自己亦周不時按摩吓塊面，所以進展良好。睇落Fit咗喎，佢就話自從塊面中咗風之後已經戒煙戒酒，加上生活檢點咗好多，早睡早起唔使成日出去應酬，又可以多啲時間陪吓屋企人，感覺自己都健康啲。咁有冇趁住暑假同家人去旅行？佢就話冇，因為仔女有好多活動所以冇乜時間出去玩，再加上依家香港經濟差，留港消費振興經濟好過啦！
行行吓，見到戶外燈光工作小組主席麥瑞琼喺置地一間時裝店裏面睇衫，見佢同職員商量挑選鈕扣，停留約廿分鐘後就走。問佢係咪買衫？佢話較早前已經買咗件冷衫，因為屋企有啲鈕扣想加上去，所以就拎嚟同職員商量吓。佢話好多時都喺中環區出入，因為位置方便，不時都會約朋友嚟呢頭飲吓茶、傾吓偈，加上中環區時裝店林立，附近又有大型超級市場，而去做嘢嘅地方多數都喺附近，時間好預算喎。
許晉平飲咖啡提神叉電
轉個頭又見到有「九巴金公主」之稱伍穎梅嘅男朋友許晉平喺歷山大廈現身，見佢快步咁入咗一間咖啡專門店買咖啡，等攞咖啡期間仲行去擺有咖啡產品嘅貨架度睇吓啲貨品，約十分鐘後拎埋咖啡離開。
問佢飲咖啡係咪提吓神，佢話係呀、叉吓電。問到幾時同女朋友結婚時，佢就笑笑口話呢樣嘢答唔到你喇！
卓妮