政情：避開空氣污染 林超英教路朝早做運動
前天文台台長林超英退咗休差唔多十年，但仍不時喺社交網站同網友分享有關天氣同環保嘅小知識，繼續教育公眾，認真有心。近日空氣污染嚴重，佢仲用圖表教大家應該朝早做運動。原來有分別o架？
林超英以元朗作例子，解釋臭氧嘅水平一般喺午後幾個鐘飆升，提醒大家避免喺咁嘅污染天氣下做運動，建議喺朝早做，晚飯後就不太適宜嘞，因為其時嘅臭氧水平可能仲處於高位，仲教大家如果想知實時嘅臭氧水平，可以參考環保署嘅網頁。
退而不休 常教大眾小知識
林超英當日仲教大家睇污染物會影響香港邊啲地區，原來由風向圖可以睇到當中嘅影響，因為氣流喺香港境內受山勢地形影響，或會分成支流，好似前日朝早九點嘅風向圖顯示，新界西部同港島西部嘅污染相對嚴重咁，仲提醒老人家、長期病患者，尤其係呼吸道有問題嘅人士要小心。睇嚟林超英真係退而不休，不斷教大家呢啲小知識。