政情：兩慳神同枱食飯 林超英自認中慳電毒
兩位慳神喺「星星飯局」相聚，佢哋就係環境局局長黃錦星同天文台前台長林超英。兩位慳神經常鬥慳電，而林超英更直認中咗慳電嘅「毒」，所以個個月電費都比局長少喎！
究竟點慳呢？最緊要係「自然」，衣食住行都可以入手。林超英話買少啲嘢，尤其係買衫，港人年中亦掉唔少，而佢就話衫未爛就唔買新嘅，就算爛咗都可以當枱布用！
黃錦星冇嘢做就行山解憂
兩個慳神都鍾意接近大自然，黃錦星話若果冇嘢做就行山解憂，又慳家又充實，但林超英就話唔會諗煩惱嘢，帶兩樽水同兩個包，行上山猶如大地在我腳下，行一次就叉足三個月電嘞！
最後林超英仲提到要走即棄餐具，話若果可以提供啲誘因，例如唔要即棄餐具可以換杯嘢飲又或者換環保餐具咁，而佢就極力推介換環保餐具，話拎番去游說埋身邊嘅人走即棄餐具喎。