中環出更：質疑囚倉壞風扇數量 邵家臻刷存在感
立法會社福界議員邵家臻早前因為佔中案被判囚八個月，但佢就算坐緊監，依然繼續刷存在感，包括過去曾經多次申請去立法會開會但被拒絕，其助理亦多次代佢去信政府部門問問題，最新搞作就係搵人代佢喺社交網站貼文，質疑懲教署就囚倉壞風扇等事宜嘅回覆，話自己親身數過囚倉Hall B三樓一共有幾多部風扇壞咗添。
服刑中嘅佢仍然有好多搞作，最新就署方指赤柱監獄有十八部風扇壞咗，佢就質疑係點樣得出相關數字，話自己作為赤柱監獄嘅囚友，親身數過囚倉Hall B三樓已經壞咗六部風扇，並且已經向太平紳士投訴咗添，質疑點樣確保數字準確。
佢又質疑當局有冇量度囚倉內嘅通風量同溫度標準，又質疑當局話手提電動風扇嘅外殼同零件會對保安構成風險嘅話，點解鬚刨同收音機又唔會有風險。
搵人社交網代貼文
睇嚟邵家臻雖然喺獄中，但係仍然好唔得閒，而且要自己個助理做好多嘢呀吓。講真嗰句，外界成日質疑邵家臻入獄後，會唔會等同有幾個月白（豆）立法會嗰份人工，依家不斷去信部門同喺社交網站貼文，相信都係想證明自己同助理仲做緊嘢咁囉！
卓妮