政情：山竹遺禍近一年 小西灣運動場重開
一到夏天，大家都會諗起放暑假，仲會令人聯想起雨季。去年超強颱風「山竹」襲港，搞到香港四周滿目瘡痍，而且仲有好多政府建築都有需要維修而暫停開放添。山竹襲港都就嚟一年，康樂及文化事務署尋日就宣布，東區小西灣運動場將會喺下周二重新開放。數數吓暑假仲有一個月左右時間，好彩運動場都趕得切開放，咁當區居民就唔使咁頻撲喇！
話說山竹襲港時，搞到成個香港立立亂，市民返工都要攀山涉水咁款，當時成街塌樹，有部分搞咗好耐都仲未清理好添。唔止塌樹問題，當時都有部分著名嘅旅遊景點、多個運動場都出晒事，其中小西灣運動場嘅觀眾席上蓋、電力系統、田徑跑道同埋草地球場等都有損毀。
逾70個活動受影響
位於港島區嘅小西灣運動場，係港島區少數有大型草地嘅運動場，過去唔止有大型球賽舉行，唔少學校都會租借運動場搞陸運會，山竹襲港後，就搞到有成七十幾個活動受影響。依家終於整番好，打風季節又差唔多到，唔知翻新過後嘅運動場又經唔經得起考驗呢？