中環出更：黃錦星假期離奇斷開放

上晝返下晝放

早前已聽聞政府高官打算推出惠民措施，希望借機平息民憤，所以各政策局都逼住要落水撲火。不過黃錦星就好似一於少理咁，早喺周一（22日）起放假，但離奇在周三嘅上午又短暫返工，同日下半晝又繼續休假，翌日又返工，所以周一問責官員大晒冷都唔見黃錦星身影，而係副局長謝展寰代為見人囉。

黃錦星早幾日斷斷續續放咗幾日假，現時已經投入工作，但唔夠半個月佢又再放假，將會喺下月七日放三日假，同樣都係放一個短假期。據了解，黃錦星嘅假期斷開放並冇特別意思，只係有嘢做就返工喎，唔通諗到新計幫政府撲火，極速搞掂又放，所以就斷開放假？

睇番過去環境局工作，好似「四電一腦」計劃就搞到垃圾圍城遭鬧爆，而社會對計劃中嘅垃圾徵費都大有保留，如果環境局真係要度橋息民憤，睇嚟唔火上加油都偷笑咁喎！

卓妮