中環出更：彭徐美雲冇親自試味煮清湯牛腩
講起炮製美食，傳統印象中嘅婦女都應該「入得廚房」，香港耀能協會主席彭徐美雲早前出席香港女童軍舉辦美食慈善宴時，講起自己過去亦係「無飯主婦」，不過後來佢囝囝竟然跟隨外婆學習煮嘢食，就算鮑參翅肚亦都煮得頭頭是道。於是彭太發憤圖強，鑽研食譜之餘又同屋企嘅外傭姐姐切磋廚藝，近年更成立「彭家廚房」以招呼一眾親朋，仲喺冇自己試味嘅情況下，炮製一道清湯牛腩添！聽落真係好厲害！
彭太話，媽咪精通廚藝，所以自己自幼毋須下廚就可以得享美食，後來鍾意煮飯後，老公同囝囝就好鍾意食牛，但自己唔食牛，於是試過只憑家人意見，唔經自己味蕾試味下成功煮到清湯牛腩，見到父子兩人食到津津有味，都覺得好滿足。
其實今次嘅美食慈善宴，目的係同各界友好敍舊兼籌募款項作拓展活動之用，女童軍香港總監李周美枝當然出席支持啦，佢講起自中學時代就已經係女童軍，過去亦有考取烹飪技能章，相信佢嘅廚藝有番兩道散手喇。不過佢話，隨住時代嘅改變，婦女所扮演嘅經濟角色日益重要，導致下廚嘅任務就交由外傭負責，亦連帶下一代嘅女士，烹飪技能難免弱咗咁話喎。
陳明耀：煮美食係藝術
香港女童軍總會副會長陳明耀亦有類似見解，佢話，當今社會兩性地位相近，夫妻兩人都出外搏殺，以致男主外女主內嘅家庭分工日趨模糊，儘管主婦唔識煮飯嘅現象已逐漸為人接受，不過陳明耀認為，女士都係應該好好咁掌握下廚技巧，因為煮美食既是一種藝術，同家人共享亦可維繫感情，若果廚藝了得，就更加樂也融融。陳明耀又講起，佢太太擅長烹飪，所以會盡量避免令到對方唔高興，否則自己會冇啖好食咁話。咁佢哋嘅感情一定好好嘞！
轉個頭又見到香港女童軍總會深水埗分會主席李騰駿，佢就話囡囡目前年紀尚幼，未到學習烹飪嘅階段，但只要囡囡一旦達到年齡嘅門檻，就會畀佢加入女童軍，相信佢會學得多方面嘅技能咁話。
卓妮