中環出更：陳淑莊癌病未愈 或再推莊民主派召集人
踏入暑假，民主派會議召集人又係時候準備換人嘞！今個立法年度本應係輪到公民黨（公文袋）接任，但公文袋擬安排嘅接任人陳淑莊（Tanya），舊年就因為佔中案準備開審，擔心要坐監讓出位置。而今年Tanya又因為早前確診腦部有腫瘤，做完手術後身體未完全康復，可能要再一次推莊！
郭家麒譚文豪無心戀戰
民主派四大板塊分別派代表喺四年任期內輪任民主派會議召集人，民主黨同專業議政已分別於首兩個年度派代表出任，今年就由議會陣線負責，下年度係現屆任期內最後一年，定必由公文袋揸莊。據了解，公文袋四名議員中，郭家麒同埋譚文豪無心戀戰喺召集人嘅工作，楊岳橋就唔想又做黨魁又做召集人，搞到個位飛來飛去，都係喺Tanya手上。
Tanya早前做完腦部手術後已逐漸「復出」，佢回覆查詢時透露，剛剛做咗三個星期電療，醫生話可能會較平常感覺攰啲，幸好近排有開始做運動仲頂得住，但都會小心謹慎啲。至於係咪會做召集人？佢就話會同黨友緊密聯繫溝通，喺身體情況許可、能夠應付到、唔好有負市民所望嘅情況下，先再作決定。
卓妮